Një njoftim i Teatrit Kombëtar duket se mbron godinën edhe për një vit. Teatri Kombëtar ka përcjellë për mediat një e-mail, përmes të cilit i bën thirrje të gjithë artistëve të skenës së pavarur të paraqesin pranë sekretarisë së Teatrit Kombëtar ose në adresën e e-mailit [email protected], projektet e tyre artistike.
TK mirëpret projektet që kërkojnë mbështetjen e Teatrit Kombëtar në infrastrukturë (salla, ambientet e punës ,teknika etj.) dhe që duan të jenë pjesë e kalendarit artistik të Teatrit Kombëtar për sezonin e ardhshëm 2018-2019.
Nga aplikimi kërkohet që në projekt të përcaktohet periudha kohore e parashikuar për ngritjen në skenë të veprës artistike, numri i shfaqjeve të parashikuara të veprës artistike dhe bëhet me dije se salla e parashikuar është “Kadri Roshi” në Teatrin Kombëtar, “Turbina” salla e vogël dhe “Turbina” salla e madhe.
Njëherësh kërkohet edhe sinopsi i veprës dhe stafi krijues dhe interpretues. Përmes njoftimit lihet të kuptohet se godina aktuale për të cilën artistët protestojnë që prej muajit shkurt, do jetë funksionale deri në muajt e parë të 2019-ës dhe bëhet fjalë për sallën “Kadri Roshi”.